MİLLET BAYRAĞIBIZ, TAMĞABIZ emda ORAYDABIZ
Colubuz bizni tüzleden tawlağa, Teyriden Allahha keltirgendi. Ol bizni tarihibizdi, qadarıbızdı. Millet Bayraq, Tamğa, Orayda halqnı cazıwun körgüztgen belgiledile. Bu simvollanı men halqıbız reabilitatsiyası üçün örge qobhan 1990-çı cıllada caraşdırğanma, artharaqda milletibizni «Camağat» atlı demokrat orğanizatsiyası alanı qabıl etgen edi.
Em alğa açıq etib qoyarğa izlegenim: Bayraqnı, Tamğanı caraşdırğan, qabıl etgen sağatda da, «Qaraçay», «Malqar» deb, ekige bölünñen halqıbıznı birligin esde tuthanbız. Millet Oraydabıznı sözlerin cazğan sağatda, eki türlü etgenme: Malqar canı razı bolsa, «As-Alan» («Qaraçay-Malqar») atlı variantı qallıqdı, alay bolmasa – quru «Qaraçay» atlı variantı soğulluqdu, cırlannıqdı. Birin Qaraçayğa, birin da Qaraçay-Malqarğa coralab, eki türlüsü bla da bolluqdu hayırlanırğa.
Bayrağıbıznı keñi, uzunu duniyada cürügen standart ölçeledile. Bayraq üç teñ kesekge üleşinedi. Baş canında boyaw – köm-kökdü – çeksiz çuwaq Köknü belgisi; biz Teyri adamı, Teyri halqı, Türq halqı bolğanıbızğa şağatlıq etedi. Ekinçi kesegi – cap-caşil betlidi; büğün biz islam musliman halq bolğanıbıznı belgisidi. Teyriden Allahha keltirgendi colubuz. Caşil boyawda, caşil nürde uçub barğan çımmaq-aq qanatlı – Miñi Tawubuz – Kavqaz curtubuznu, miyiklikni, tazalıqnı belgisidi. Bayraqnı em tübünde boyaw – qızıldı. Bu curtnu cawladan saqlay, halqnı tögülgen qanını belgisidi.
Bayrağıbızda bolğan boyawla-mağanala saqlanadıla Tamğabızda da. Cañız, Kökden Cerge-Curtha sozulğan Aynı quçağındadı Miñi Taw cetimüyüş culduzu bla başında. Aq bars çekni saqlaydı. Aq bars (qar bars) Alan qralıbızdan kelgen belgidi. Ay bla culduz islam dinni belgisidi. Culduznu cetimüyüş bolğanı – «cetini»- taşa, turu da köb mağanası bolğanından çığadı. Tamğa üç boyawlu qurşownu içindedi.
Teatr taqqıçdan başlanadı deydile, halq a – bayraqdan. Duniyanı başında bayrağı, tamğası, oraydası bolmağan halq barmıdı? Coqdu. «Börü atarıq – börkünden» deydile. Bayraq – ol halqnı börküdü. Adamnı (manqurt bolmay, adam ese ol) atı, tuqumu bolmay madar bolmağança, Halqnı da (sürüw bolmay, halq ese ol) Bayrağı, Tamğası, Oraydası bolmay amal coqdu. Bizni halq ömürleni uzağına qral bola, qrallıq cürüte kelgenine şağatlıq etgen – Flag, Gerb, Gimn sözle bizni tilibizde bardıla – Bayraq, Tamğa, Orayda. Ömürleni uzağına ol simvolla türlene kelgendile. Barın da esge ala, caraşdırğanma bu sıylı millet belgileni. 1990-çı cıllada «Camağat» qabıl etgen Bayraqnı, Tamğanı, Oraydanı halqıbız örge tutar deb, umut eteme.
Milletlearası Türq Aqademiyanı emda Qaraçay-Çerkes qral universitetni sıylı doqtoru, Qaraçay-Çerkes cumhuriyetni halq şayırı, «As-Alan» derginHalqıbıznı millet oraydası-marşı-gimni AS-ALAN Beş Taw Eli –
qoşulğan cer nür bla kar – Bashan, Çegem, Holam, Bızıñı, Malqar;
Beştaw canı, Arhız, Mahar, Teberdi...
Cer cannetin ullu Allah bizge berdi, Miñi Tawnu Senñe tıyınşlı kördü, Oy Qaraçay-Malqar halqı – As-Alan!
Teyri adamı, Teyri halqı, as-salam!
Qara tanığan bilim halqı, orayda!
Ne zalimni allında da bügülmey, Qara kün da erkinlikden tüñülmey,
Taş başında caşaw ete kelgense, Ötgür millet, öhtem millet As-Alan!
Ötgür millet, öhtem millet, as-salam!
Qablan köllü cigit millet, orayda!
Nença kere Künü, Ayı tutulğan, Ança kere celmawuzdan kutulğan,
Temirlege, Kurçlağa da katılğan, Oy türq halqı, aq bars halqı, As-Alan!
Türq-musliman Kavqaz halqı, as-salam!
Türq-musliman Kavqaz curtu, orayda!
Üzmegense eçki, arpa urluğun, Cigitlikni, adamlıqnı korluğun,
Burun kibik kral kuradıñ-qurduñ, O nart halqı, alan halqı, As-Alan!
O nart halqı, alan halqı, as-salam!
O nart halqı, alan halqı, orayda!
Bardı seni imanıñ da, diniñ da, Ösüb kelgen sarıcilik tölüñ da,
Qatılmazla Saña kartlıq, ölüm da, Ömürlege caşarıqsa As-Alan!
Şan Qaraçay-Malqar halqı – As-Alan!
Şam Qaraçay-Malqar curtu – As-Alan!
Büğünüñe, tamblaña da as-salam!
Büğünüñe, tamblaña da orayda!
i baş redaktoru Laypanlanı Bilal
Qaraçaynı millet oraydası-marşı-gimni QARAÇAY Beştaw canı, Arhız, Mahar, Teberdi...
Miyik Curtnu bizge Teyribiz berdi, Miñi Tawnu Senñe tıyınşlı kördü, Culduz halqı, Teyri halqı Qaraçay!
Miñi Tawnu Senñe tıyınşlı kördü, Culduz halqı, Teyri halqı Qaraçay!
Ne zalimni allında da bügülmey, Qara kün da erkinlikden tüñülmey, Taş başında caşaw ete kelgense, Ötgür millet, öhtem millet Qaraçay!
Taş başında caşaw ete kelgense, Ötgür millet, öhtem millet Qaraçay!
Nença kere KÜNÜ, AYI tutulğan, Ança kere celmawuzdan qutulğan, Temirlege, Qurçlağa da qatılğan, Dew halisin körgüztgendi Qaraçay!
Temirlege, Qurçlağa da qatılğan, Dew halisin körgüztgendi Qaraçay!
Üzmegense nartüh, arpa urluğun, Cigitlikni, adamlıqnı qorluğun, Burun kibik qral quradıñ, qurduñ, O nart halqı, alan halqı Qaraçay!
Burun kibik qral quradıñ, qurduñ, O nart halqı, alan halqı Qaraçay!
Bardı seni Allahıñ da, tiliñ da, Ösüb kelgen sarıcilik tölüñ da, Qatılmazla Senñe qartlıq, ölüm da, Ömürlege caşarıqsa Qaraçay!
Qatılmazla Senñe qartlıq, ölüm da, Ömürlege caşarıqsa Qaraçay!
|
